Vün a dré a l’altro nela natüra

L’è bel incontras in grüp per fàa una pasegiada, 

per nàa in gìir nela natüra, in un sìit indoa a ghè mia guera ...

 Ogni pianta e l’erbascia l’à ga el so posc’t per vìiv

 e crés inséma tra da lòor…

 A vedom di tronch … da chi elemént  che i ga la so età e che

 i sé creàad el so sc’pazi nel temp. 

Se l’è mia una vegia pianta da casc’tegna l’è un fò. 

Da chi tronch che a taiai giò a toch e tochit  

ié a sée per sc’caldàa un inverno intréegh. 

Sül sentée ben marcàad a sc’chisciom la föia seca da l’an pasàad…

  con da pàrt tanto verd e tanti fiòor, 

da chìi che a trövom mia in cà o in campagna. 

Ai Mònt da Casc’lan la varietà di condizion ambiental la sa  riflèt anca nela ricchezza di associaziòn vegetai diversi e in part  rari...

Ti trövi di fiòor con di colòor a forma particolàar, come l’ orchidea 

che la  sc’punta fö da tera trovando sc’pazi nel verd. 

E pö, un'altra volta, a sa incaminom  vun dré l’altro per nàa in sü ..

tenendo un certo sc’pazi tra vun e l’altro per rivàa sül Monte Boglia…

 Chi a  sa rampiga un tornant dopo l’altro fin sü a la cima, 

un sentée dür che u cosc’ta tanta fadiga per i meno alenàad,

 trovando pöo in alt  una visc’ta sü Lügan che l’è una meraviglia.

Ma che pàas a vedée in gìir  tüt i vàl e i paesit  dela Capriasc’ca …

e guardando püsée in gio a sa véed i làagh da Lügan, da Müzàn, 

da Origlio … e püsée in fond  el Lagh Magiòor e chel da Còm … 

tüt inscì bel  da lüsc’tras i öc’ sota a un bel cièl serèn. 

E pö… vün a dré a l’altro, tornàa  giò a Brè sü un sentée che o finiva mai,  

con un màa ai gàmb e ai’ üng di pè chi ma brüsava … quasi da dovée piang’ !

Gianclaudio Lanini